සාඩම්බර ඉතිහාසයක්‌ හිමි ශේ්‍රෂ්ඨ ව්‍යවහාර භාෂාවක්‌ වන සිංහලය තොරතුරු තාක්‌ෂණික ලෝකයේ තම අනන්‍යතාව තහවුරු කරගන්නේ මෙබඳු සන්දර්භයක්‌ තුළ ය. ඈත ගම් දනව්වක ජීවත් වන ගොවි මහතකුට මෙන්ම රටින් දුර බැහැර ව විදෙස්‌ගත වී සිටින අයකුට ද කිසිදු බාධාවකින් තොර ව තම මවු භාෂාවෙන් ම සියලු කටයුතු කරගැනීමට හැකි පොදු වේදිකාවක්‌ දැන් විවර වී තිබේ.
නො හඳුනන සිංහල
පරිගණකය ආශ්‍රිතව සිංහල භාෂාවෙන් කටයුතු කිරීමට බොහෝ කාලයකට පෙර හැකි ව තිබුණත් ඒ සඳහා නිවැරැදි සහ සම්මත ක්‍රමවේදයක්‌ භාවිත වී නො තිබිණි. සිංහල මෘදුකාංග, සිංහල වෙබ් අඩවි සැලකිය යුතු ප්‍රමාණයක්‌ නිර්මාණය වී තිබුණු නමුත් ඒවා පරිශීලනයට විවිධ බාධා පැනනැඟී තිබිණි. සිංහලෙන් යතුරු ලියනය කළ හැකි යතුරුපුවරු කිහිපයක්‌ හා අකුරු මෝස්‌තර රැසක්‌ සාමාන්‍ය කටයුතු සඳහා භාවිත විය. එහෙත් මෙතෙක්‌ කල් පරිගණකයේ සිංහලෙන් ලිවීමට භාවිත කළ ක්‍රමවේදයන් තුළ වූ වැඩසටහන්වලට තවදුරටත් වර්ධනය වීමට නොහැකි අන්දමේ බරපතල බාධාවක්‌ විය. ඒ පරිගණකය සැබෑවට ම සිංහල භාෂාව නො හැඳිනීමයි.
සාමාන්‍යයෙන් අපි සිංහල අකුරක්‌ යතුරුලියනය කළ විට පරිගණකය හඳුනාගන්නේ යතුරු පුවරුවේ ඊට අනුරූප ඉංග්‍රීසි අකුර හෝ අකුරු පෙළ ය. ඉන්පසු පරිගණකය එම යතුරු සංයෝජනයට අදාළව එයට ඇතුළත් කර ඇති. නිශ්චිත සංකේතයක්‌ තිරයට යොමු කරයි. අපි සිංහල අකුරක්‌ ලෙස හඳුනාගන්නේ මෙම සංකේතයයි.
මෙම ක්‍රමය අනුගමනය කිරීමෙන් සිංහලෙන් කරන ලියකියවිලි කටයුතු පරිගණකය ආධාරයෙන් කරගත හැකි වුවත් එය භාවිතයේ දී විවිධාකාර අපහසුතා සහ දුර්වලතා රැසකට මුහුණ දීමට සිදු වේ. ප්‍රධාන ගැටලුවක්‌ වන්නේ යම් ලිපියක්‌ යතුරුලියනය කර වෙනත් පරිගණකයක විවෘත කළ විට එහි ඊට අදාළ අකුරු වර්ගය නැත්නම් ලිපිය නිවැරැදිව දර්ශනය නො වීමයි. අන්තර්ජාලයේ කටයුතු කිරීම්වල දී මෙය බරපතල බාධාවකි. මෙය සිදු වන්නේ සම්මත යතුරු පුවරුවක්‌ නොමැතිකම නිසා ය.
අනෙක්‌ අතට පරිගණකය සිංහල ලිපිය හඳුනාගන්නේ ඉංග්‍රීසි අකුරුවලින් සෑදුණු වචන කාණ්‌ඩ සමූහයක්‌ ලෙස නිසා යතුරු ලියනය කරන මෘදුකාංගයේ ඉංග්‍රීසි ස්‌වයං නිවැරැදි කරන යෙදුමක්‌ ඇත්නම් ලිපිය වැරැදි වචනවලින් සමන්විත වූවක්‌ ලෙස පෙන්වා දෙයි. සිංහල වචන සමූහයක්‌ අකාරාදී අනුපිළිවෙළකට සැකසීම ආදී භාෂා පරිහරණයේ වර්ධිත අවස්‌ථාවන්ට යැමට නොහැකි වන්නේ ද මෙලෙස පරිගණකය සිංහල භාෂාව නො හැඳිනීම නිසා ය.
විශ්ව ව්‍යාප්ත භාෂාවක්‌ කරා..
පරිගණකගත සිංහල හෝඩියේ තිබූ දුර්වලතා මඟහරවාගනිමින් විශ්ව ව්‍යාප්ත ප්‍රමිතිගත පරිගණක භාෂාවක්‌ බවට සිංහල භාෂාව පත් කිරීමේ අවශ්‍යතාව බොහෝ කලකට පෙර සිට ම මතු වී තිබිණි. එබන්දකින් තොර ව තොරතුරු තාක්‌ෂණයේ අසීමිත ප්‍රතිලාභ නෙළා ගැනීමට රටක්‌ වශයෙන් අපට නොහැකි වන බව ඉතා පැහැදිලිව පෙනී යන කරුණකි. මහාචාර්ය වී. කේ. සමරනායක, මහාචාර්ය ඡේ. බී. දිසානායක, මහාචාර්ය ගිහාන් ඩයස්‌ ආදී විද්වතුන් ප්‍රමුඛව ශ්‍රී ලංකා තොරතුරු හා සන්නිවේදන නියෝජිත ආයතනය, රාජ්‍ය භාෂා දෙපාර්තමේන්තුව, කොළඹ විශ්වවිද්‍යාලය, මොරටුව විශ්වවිද්‍යාලය, හා ආතර් සී. ක්‌ලාක්‌ මධ්‍යස්‌ථානය වැනි ආයතන මෙම අරමුණ ඉෂ්ට කර ගැනීම සඳහා සාමූහික ප්‍රයත්නයක නිරත විය. මේ සඳහා ඔවුන් භාවිත කළ ආයුධය වූයේ Unicode (යුනිකෝඩ්) කේත ක්‍රමය ය. විවිධ බාධක මැදින් වසර ගණනාවක්‌ තිස්‌සේ කළ බැරෑරුම් ව්‍යාපාරයක යහ ඵල විඳින්නට අද ශ්‍රී ලාංකිකයන්ට හැකි ව තිබේ.
90 දශකයේ පටන් ඇරඹූ සිංහල සම්මතව පරිගණකගත කිරීමේ ව්‍යායාමයේ දී සිංහල අකාරාදිය පිළිබඳව එකඟතාවකට පැමිණීම, තොරතුරු හුවමාරුව සඳහා වූ සම්මත සිංහල කේත ක්‍රමයක්‌ SLS 1134 ලෙස සම්මත කර ගැනීම ආදිය ඉටු කෙරිණි. 2002 වසරේ දී යුනිකෝඩ් ක්‍රමයට අනුකූල සිංහල අකුරු මෝස්‌තර හෙවත් ෆොන්ට්‌ස්‌ නිර්මාණය සඳහා කමිටුවක්‌ පත් කෙරුණු අතර එමඟින් සිංහල යුනිකෝඩ් කේත ක්‍රමය දියුණු කිරීම, සිංහල යුනිකෝඩ් අකුරු වර්ග නිර්මාණය, සම්මත සිංහල යතුරු පුවරුවක්‌ හඳුන්වා දීම හා ප්‍රමිතිගත පරිගණක යෙදුම් හා උපයෝගී මෘදුකාංග නිපදවීම ආදී බොහෝ කටයුතු සිදු විය. මීට සමගාමීව දෙමළ භාෂාව ද යුනිකෝඩ් භාවිතයෙන් සම්මතව කේතනය කෙරිණි. අද වන විට මෙම එකමුතුව මගින් සිංහලෙන් පරිගණක භාවිත කිරීම සඳහා ශක්‌තිමත් පුළුල් පදනමක්‌ නිර්මාණය කර ඇත. ඒ මඟින් අසීමිත හැකියාවන් ගෙන් හා ඉඩ හසරකින් යුත් සයිබර් අවකාශයට සිංහලෙන් ම පිවිසීමට වේදිකාව විවර වී ඇති අතර ඒ මත ශ්‍රී ලාංකිකයන්ට තම සැබෑ ශක්‌තිය හා අනන්‍යතාව විදහා දැක්‌වීමට හැකි ව තිබේ.
මොකක්‌ ද මේ UNICODE?
e-ලෝකයේ සීමා මායිම් බිඳ දමන Unicode යනු ලෝකයේ ඇති සෑම භාෂාවක ම, සෑම අකුරකට ම තනි විශ්වීය අනන්‍යතාවක්‌ ලබා දෙන කේත ක්‍රමයකි. මෙමඟින් ලෝකයේ ඇති සෑම අක්‌ෂරයකට ම ඊට පමණක් අනන්‍ය වූ අංකයක්‌ ලබා දෙයි. මෙමඟින් සෑම භාෂාවකට ම සෘජු හැඳිනීමක්‌ පරිගණකය තුළින් ම ලැබෙන අතර එය භාවිත වන පරිගණක පද්ධතියෙන් හෝ වැඩසටහනෙන් හෝ ස්‌වායත්ත වෙයි. මෙමඟින් ඕනෑ ම රටක වැසියකුට ඕනෑ ම මෙහෙයුම් පද්ධතියක්‌ තුළ තම මවු භාෂාවෙන් ම ලිවීම් හා කියවීම් කටයුතු කිරීමට අවස්‌ථාව ලැබේ. දැනට මෙම ක්‍රමයෙන් ලෝකයේ භාෂා රැසක අක්‌ෂර 100,713ක්‌ පමණ කේතනය කර ඇත.
Microsoft, IBM, Apple, HP, Just System, Oracle, Sun ආදී ලෝකයේ පරිගණක ක්‌ෂේත්‍රයේ නියමු ආයතන සියල්ල ම පාහේ දැන් Unicode සම්මතයන්ට හැඩගැසී ඇත. එමෙන්ම මෑතකාලීනව නිර්මාණය වුණු බොහෝ මෙහෙයුම් පද්ධති වෙබ් බ්‍රවුසර හා අනෙකුත් නිපැයුම් බොහොමයක්‌ Unicode සඳහා සහාය දෙයි. පරිගණක ලෝකයේ විශ්ව අක්‌ෂර පද්ධතියක්‌ නිර්මාණය කර ගැනීම සඳහා වූ නිල ක්‍රමවේදය ලෙස පිළිගැනෙන්නේ Unicode කේත ක්‍රමයයි.
ඔබේ පරිගණකයේත් සිංහල Unicode පිහිටුවා ගන්න
Microsoft සමාගමෙන් නිකුත් කරනු ලැබූ Windows XP service pack 2 සහ ඉන් පසු නිකුත් කළ Windows Vista හා Windows 7 මෙහෙයුම් පද්ධති Unicode කේත ක්‍රමයට අනුකූලතාව දක්‌වයි. මීට අමතරව Linux, Debian, Ubuntu වැනි විවෘත මෙහෙයුම් පද්ධතිවල ද සිංහල Unicode පිහිටුවා ගත හැකිs ය. මේ සඳහා අනුගමනය කළ යුතු ක්‍රියා පටිපාටිය පිළිබඳ උපදෙස්‌ හා බාගත කළ යුතු සහායක ගොනු www.siyabas,lk වෙබ් අඩවියෙන් පහසුවෙන් නොමිලේ ලබාගත හැකි ය. මීට අමතරව යුනිකෝඩ් සම්බන්ධව මතු වන ඕනෑ ම ගැටලුවක්‌ නිරාකරණය කර ගැනීමට අන්තර්ජාලය තුළ ඒ පිළිබඳ විද්වතුන් එකතු වී සිsංහල යුනිකේත සමූහයක්‌ ගොඩනංවා ඇත. http//:groups.google.com/group/sinhala-unicode ඔස්‌සේ ඔවුන්ගේ සහායද ලබාගත හැකිය
සිංහල භාවිත යෙදුම්
සිංහල Unicode භාවිතය ඇරඹී ගත වී ඇත්තේ කෙටි කාලයක්‌ පමණක් නමුත් දැනටමත් ඒ අනුසාරයෙන් ආකර්ෂණීය යෙදුම් සැලකිය යුතු ප්‍රමාණයක්‌ නිර්මාණය වී ඇත. වෙබ් බ්‍රවුසර හා ඊමේල් ලිපි යෙදුම් ආදිය මීට අයත් ය. මේ යෙදුම් මඟින් සිංහලෙන් සයිබර් අවකාශයේ සැරිසරන්නට රුචි කරන්නන්ට අවශ්‍ය නිදහස හිමි වී ඇත.
සිංහල වෙබ් අඩවි හා බ්ලොග් අඩවි
සිංහලෙන් පරිශීලනය කළ හැකි වෙබ් අඩවි හා බ්ලොග් අඩවි රාශියක්‌ අන්තර්ජාලයේ පවතී. විශේෂයෙන් ශ්‍රී ලංකාව තුළ වෙළෙඳ හා වෙළෙඳ ප්‍රචාරණ කටයුතු සඳහා අන්තර්ජාලය තුළ මනා පරිසරයක්‌ නිර්මාණය වී ඇත. සිංහලෙන් බ්ලොග් ලිවීම යෞවනයන් ගේ අලුත් විලාසිතාවක්‌ බවට පත් වී ඇත.
වෙබ් අඩවි අතරින් රාජ්‍ය අංශයේ වෙබ් අඩවි කැපී පෙනේ. ICTA ආයතනය මඟින් බොහෝ රාජ්‍ය ආයතන සඳහා වෙබ් අඩවි නිර්මාණය කර ඇති අතර මේ මඟින් කිසිදු රස්‌තියාදුවකින් තොරව තොරතුරු ලබා ගැනීමට හා කටයුතු ඉටු කර ගැනීමට සාමාන්‍ය ජනතාවට අවස්‌ථාව ලැබේ.
සෙවුම් යන්ත්‍ර
ජනප්‍රිය සෙවුම් යන්ත්‍ර වන Google හා Yahoo සෙවුම් යන්ත්‍ර මගින් සිංහල පද යොදා සෙවුම් කටයුතු කිරීමට දැන් හැකියාව ලැබී තිබේ. සිංහල Unicode භාවිතය නිසා මේ වන විට ද සමාජයට ඇති වී තිබෙන දැඩි බලපෑම සිංහලෙන් කරන සෙවීමක දී ලැබෙන අතිවිශාල ප්‍රතිඵල සංඛ්‍යාවෙන් ම මැනගත හැකි ය.
සිංහල විකිය
අන්තර්ජාලයේ ජනප්‍රිය විශ්වකෝෂයක්‌ වන Wikipedia සිංහල සොහොයුරකු දැන් නිර්මාණය වී තිබේ. සෑම කෙනකුට ම තම දැනුම සපයා සිංහල විකිය පෝෂණය කළ හැකි ය. තැනින් තැන මුද්‍රිත මාධ්‍යයෙන් විසිරී තිබෙන දැනුම ඒකරාශි කර කාලයෙන් හා අවකාශයෙන් ස්‌වායත්ත වූ මහා සිංහල පුස්‌තකාලයක්‌ පිහිටුවීමේ අවකාශය දැන් නිර්මාණය වී තිබේ.
ඔෆිස්‌ යෙදුම්
Microsoft සමාගමේ Word Excal ආදී ඔෆිස්‌ පැකේජයේ මෘදුකාංග සහ ඊට අනුරූපව
නිර්මාණය වූ විවෘත මෘදුකාංග සමග සිංහලෙන් කටයුතු කිරීමේ අවස්‌ථාව දැන් හිමි වී තිබේ. සිංහල මුහුණතක සිංහල යෙදුම් භාවිතයෙන් රාජකාරි කටයුතු කරගැනීමට හැකි වීම නිසා හෙට අනිද්දා ගමේ සිල්ලර කඩවල පවා පරිගණකයක්‌ දැක ගැනීමට හැකි වනු ඇත.
ශබ්ද කෝෂ
මෙතෙක්‌ කල් පරිගණක භාවිත කරන්නන්ට ඉමහත් සේවයක්‌ සැපයූ මධුර ශබ්දකෝෂයේ සහාය දැන් අන්තර්ජාලයෙන් ලබාගත හැකි ය. එමෙන්ම රාජ්‍ය භාෂා දෙපාර්තමේන්තුවෙන් නිකුත් කරන ලද පාරිභාෂික ශබ්ද මාලාවන් සියල්ල දැන් සෘජුව ම අන්තර්ජාලය හරහා පිරික්‌සිය හැකි ය. මෙමඟින් අන්තර්ජාලය තුළින් බාහිර ලෝකය පිරික්‌සීමේ භාෂාමය බාධාවන් මඟහැරී යයි. තව තවත් පුළුල් වාග් මාලාවන් ඉදිරියේ දී අන්තර්ජාලයට එකතු වනු ඇති අතර වැරැදි සිංහල වචන ස්‌වයංසිද්ධව නිවැරැදි කිරීමේ යෙදුම් ආදී වර්ධිත භාෂාමය යෙදුම් ඒ හරහා නිර්මාණය වනු ඇත.
ෆොන්ට්‌ පරිවර්තක
මෙතෙක්‌ භාවිත වූ ක්‍රමවේදයට අනුව වෙනත් යතුරු පුවරුවකින් සමාන්‍ය පරිදි යතුරු ලියනය කළ සිංහල වදන් කොටස්‌ සෘජුව ම සම්මත යුනිකෝඩ් වදන් කොටස්‌ බවට පරිවර්තනය කළ හැකි පරිවර්තක යෙදුමක්‌ නිපදවා තිබේ. මෙමඟින් ප්‍රායෝගික ගැටලු නිසා තවමත් සම්මත යතුරු පුවරුව භාවිත කිරීමට නොහැකි පිරිස්‌ හා ආයතනවලට එසේ නො කර ම යුනිකෝඩ් භාවිතයේ වාසි හා ඵල ප්‍රයෝජන විඳීමට හැකි වේ.
මෙම යෙදුම් හා මෙබඳු ප්‍රයෝජනවත් යෙදුම් විශාල ප්‍රමාණයක්‌ www.siyabas.com සහ www.lakapps.lk වෙබ් අඩවි ඔස්‌සේ මෙන්ම http//:www.ucsc.cmb.ac.lk/ltrl/?page=downloads යන වෙබ් ලිපිනය ඔස්‌සේ නොමිලේ බාගත කරගත හැකි ය.
පෙරළියක අනාගතය
පරිගණක තාක්‌ෂණය ගමට ගෙන යැමට ද සියබස විශ්ව ව්‍යාප්ත භාවිතාවක්‌ බවට පත් කිරීමට ද කාලයක්‌ තිස්‌සේ දරන ලද නොතිත් අරගලය විජයග්‍රහණයක්‌ බවට පත් වන්නේ ඹබසජදාe සම්ප්‍රාප්තියත් සමග ය. එහි සුබ ඵල වර්තමානයටත් වඩා අනාගතයට විඳින්aනට හැකි වනු ඇත.
සිංහලෙන් පරිගණක භාවිතය ජනප්‍රිය කරවීම සඳහා රාජ්‍ය මැදිහත්වීම පුළුල් මට්‌ටමකින් සිදු වේ. ICTA සහ රාජ්‍ය භාෂා දෙපාර්තමේන්තුව මෙහි ලා කැපී පෙනෙන කාර්යභාරයක්‌ ඉටු කරයි. දැනටමත් පාසල් හා රාජ්‍ය ආයතනවල යුනිකෝඩ් පහසුකම පිහිටුවීම අනිවාර්ය කොට ඇත. එමෙන්ම නුදුරේ දී ම ශ්‍රී ලංකාවේ ඕනෑ ම අලෙවිකරුවකු ගෙන් පරිගණකයක්‌ මිල දී ගන්නා විට එහි සිංහල යුනිකෝඩ්, අලෙවියේ දී ම පිහිටුවා තිබෙනු ඇත. ඒ සඳහා යෙදිය යුතු විධි විධාන දැනටමත් යෙදෙමින් පවතියි.
පරිගණකය සිංහල හැඳිනූ පමණින් එය ජනප්‍රිය හෝ ප්‍රයෝජනවත් නො වේ. ඒ සඳහා සිංහල යෙදුම් හා මෘදුකාංග නිර්මාණය කිරීම අත්‍යවශ්‍ය කාරණයකි. කොළඹ හා මොරටුව විශ්වවිද්‍යාලයන්හි පරිගණක අංශය, ICTA ආයතනය බඳු ආයතනවල දායකත්වයෙන් දැනටමත් සැලකිය යුතු යෙදුම් ප්‍රමාණයක්‌ නිර්මාණය වී ඇත. එහෙත් මේ සඳහා සියලු ශ්‍රී ලාංකේය පරිගණක ආශ්‍රිත ආයතනවල හා මෘදුකාංග නිපදවන්නන් ගේ දායකත්වය ලැබිය යුතු ය. මෙතෙක්‌ සංකීර්ණ මෘදුකාංග නිපදවීමට තිබූ විවිධ බාධක සියල්ල ඉවත් වී ඇති බැවින් පරිගණක ක්‌ෂේත්‍රයේ දක්‌ෂ නව නිර්මාණකරුවන්ට තම දක්ෂතා එළිදැක්‌වීමට ඉඩකඩ නිර්මාණය වී ඇත. එමෙන්ම ජනප්‍රිය මෙහෙයුම් පද්ධතිවල සිංහල සහාය තවදුරටත් ඉහළ නැංවීමත්, අන්තර්ජාල සේවාවල සිංහල සහාය තවදුරටත් පුළුල් කිරීමත් ඉදිරියේ දී සිදු වනු ඇත. එමෙන්ම අනාගතය උදෙසා සිංහල වෙබ් ලිපින සැකසීම හා ශ්‍රී ලංකාවට "ලංකා" නමින් ම ඩොමේන් නාමයක්‌ ලබාගැනීම ආදී සිත්ඇදගන්නාසුලු කටයුතු දැනටමත් සිදු වෙමින් පවතී.
සයිබර් අවකාශයට සිංහලෙන් පිවිසීමේ වරම නිසා ලැබෙන බලය පිළිබඳ හැඟීම අතිශය ආශ්වාදජනක ය. බාල, මහලු, ග්‍රාමීය, නාගරික සියලු දෙනාට ම භාෂාමය බාධාවකින් තොර ව තොරතුරු තාක්‌ෂණයේ දියුණුව නිසා ලැබිය යුතු ව තිබූ ප්‍රතිලාභයන් දැන් ලැබිය හැකි ය. එහි ප්‍රතිඵලය වනු ඇත්තේ රටේ සමාජ ආර්ථික දේහය වඩා සාධනීයව පුළුල් වීමයි. මේ නව මාධ්‍ය භාවිතාව තුළ තොරතුරු හුවමාරුවට, සබඳතා වර්ධනයට හා මතවාදමය ප්‍රකාශනයන්ට වැඩි ඉඩක්‌ විවර වී තිබේ. මේ තත්ත්වය නව පන්නයේ බුද්ධිමය කතිකාවන්ට හොඳ තෝතැන්නකි. විශේෂයෙන් පශ්චාත් නූතනවාදීන් හා තරුණ ආගමික සංවාදශීලීන් දැනටමත් මේ නව අවකාශයෙන් ප්‍රයෝජන ගැනීම අරඹා තිබේ. එමෙන්ම ගොවීන් හා ගැනුම්කරුවන් අතර පැවතුණු පරතරය අවම කරන්නට මෙතෙක්‌ දරන ලද ආකර්යක්‌ෂම ප්‍රයත්නය දැන් සාර්ථක කර ගැනීමට හැකි ව තිබේ. අනෙකුත් භාණ්‌ඩ සඳහා ද තරගකාරී e-වෙළෙඳපොළක්‌ හා වෙළෙඳ දැන්වීම්කරණයේ නව මාවතක්‌ විවර වීම මඟින් වෙළෙඳ පාරිභෝගික දෙපාර්ශ්වයට ම වාසිදායක තත්ත්වයක්‌ නිර්මාණය වේ.
සිංහල පරිගණකයේ වාසිය සෘජුව ම ලබනු ඇත්තේ සාහිත්‍ය ක්‌ෂේත්‍රයයි. නවක සාහිත්‍යකරුවන්ට තම අදහස්‌ ප්‍රකාශ කිරීමට හා නිර්මාණ ඉදිරිපත් කිරීමට හැකි නව e-සාහිත්‍ය ප්‍රවණතාවක්‌ බිහි වනු ඇත. අධිපති මාධ්‍ය ඔස්‌සේ අදහස්‌ ප්‍රකාශ කරන්නට ඉඩ නො ලැබෙන සාමාන්‍ය ජනතාවට නව ප්‍රකාශන මාධ්‍යයක්‌ බිහි වනවාට අමතරව සෑම සියලු ක්‌ෂේත්‍රයක ම ඒකාධිකාරයන් දරන්නන්ට එරෙහි ව මත පළ කිරීමේ සාධාරණ අවස්‌ථාවක්‌ සෑම දෙනාට ම හිමි වනු ඇත.
මෙකී නො කී විවිධාකාර වූ නවමු මානයන් ඔස්‌සේ පියවර තබන්නට ශ්‍රී ලාංකිකයන්ට ඉඩ හසර විවර වී ඇති බැවින් එහි අනාගත හැඩතල පිළිබඳ සම්පූර්ණ නිගමනයකට ඒම අපහසු ය. කෙසේ වෙතත් යුනිකෝඩ් සම්ප්‍රාප්තිය මඟින් ශ්‍රී ලාංකේය තොරතුරු තාක්‌ෂණ කලාව ගව් ගණනක්‌ උඩින් ඔසවා තබා ඇති බැව් නම් නිසැකව ම කිව හැකි ය.
